Whereyourlipsbegin

في ذلك اﻷفق البعيد تعيش امرأة. في ذهب الشمس تلمع عيناها وفي حرِّ لهيبها تسطع الابتسامة. أحببت فيها عينيها حين ابتسمت. امرأة ثلجيّة تحوي الشمس داخلها. جميلة البرد. بعيدة.  تختبأ في قالب من ثلج وهي الشمس بعينها.  تخدع من حولها فقليلون يفهمون. قلبٌ دافءٌ يحتمي في اﻷلم، من اﻷلم. يختلس النظر على ضحيّّته من كتلة ثلجيّة، تُفتِّح الجراح وتُجمِّد الدّم.  أقسى أنواع اﻷلم هو البرد. يقتل بهدوء، وفي خدعة البرد البريء السّاذج يحطّم قلوب الحالمين ويطرد طيف الغمرة.  هذا القلب هو شهب من نار. نكر النّار وتبنّى الثّلج ﻷنه اﻷقسى والأسهل.  أميرة الثّلج الدافئة. أنا على موعد مع ذكراك غدا.  أما زلت تذكرين؟ أنا لم أنسى. لكني أشتاق. فتواعدتُ والذكرى، لعلّ طيفك يزورني. لعلّ صورتك تلوِّن تلك الحيطان التّافهة. لعلّ الغمرة تطلُّ من بعيد وتطرد برد السّرير الفارغ.  كوني على الموعد أيتها الذكرى. فأميرة البرد اشتاقت الدّفء. وأنا أنتظرها.

تدور علاقة غريبة بين هذا اللاعب اﻷسطوري والكرة. لم تعد الكرة كرة. أصبحت عشيقة يراقصها هذا الفنان، لا بل يداعبها وهي إلى اﻷبد وفيّة. تعدّى اللعب اﻷداء، وتعدّى الهدف الهدف. وأصبحت اللّعبة سيمفونية مخطوطة بأقدام إلهية تشعّ حقلا مغناطسيّا مع الكرة الجذابة، فتقع هذه بشباك حب رجل يدعى ميسي. لعبة في الجمال هي. وقصّة حب.

مين بقلنا شو الواقع وشو الوهم؟ مين بقلنا شو الفرق بينن.. وكيف منعرف نحنا وين.. الحواس..؟ بيخدعوا. بصوروا وهم كأنو واقع ومنعيش وهم كأنو واقع، ومنوقع بصورة كأنها حقيقة. صورة مرسومة قصة مكتوبة خبار مرشوشة.. منوقع فيون... عأساس هيدا الواقع. نحنا الواقعين.. بقلب وهم جميل حولنا لشبه حقيقة، وضعنا بينن. بالنهاية، كل شي بيختفي.. بالنهاية، كل شي إلو صورة.. خيال يمكن.. انعكاس.. أو أكتر. بس بالنهاية، كل شي بيختفي.. وبيصير واحد. مين؟ واقع؟ أو وهم؟

بتروح اﻷم. بضيع البي. بيإسى الخي. بتنهار الأخت. والوجع مسكت الكل. الوجع إبليس لي عم يلعب فين ويألف قصصن وخرافات مؤذية. وينك يا نهلة، بنهار ما شرقت في الشمس عاﻷخوة. بنهار ماتوا هني وعايشين. نهار ضاع الحب وعاش الخلاف على الإختلاف وانتهوا اﻷخوة وما انكسر الشر. وينك؟ بتمنى ما يكون اﻷذى واصلك. من قلبي بتمنى. هي عم تحاول أو بعتقد عم تحاول. بس في ماضي تقيل. في وجع قديم. في بواب ضايعة مفاتيحا. في حب... يمكن عم يتلاشى. وغضب عم يكبر ويتغذى. في موت يومي. وينك؟ ارجعي وموتي معنا كل يوم. مش أمتع من موتة وحدة أبدية؟ من مغامرة باتجاه واحد؟ أنا كل يوم عم روح وإجي. كل يوم عم جرب لاقيكي. كل يوم بدي إتمتع فيكي. كل يوم.. بدي استرجع الخي الضايع، منك. بدي شوفو بعيونك متل ما عرفتي. طفل ما كبر. حب ما انتهى. لعب ما خلص. ضحك ما انخفى. كل يوم يا نهلة. كل يوم. وينك؟

عم بتوجّع بدي قول بس في نفس مخطوف ما عم يسمحلي. بعتقد في عضمة بجسمي مش إلي. بعتقد إنك تركتا معي بغير زمان ونسيت. بس شفتك صرخت العضمة. عرفت صاحبا. أنا ما فهمت شو صار. وجعني جسمي كتير. بس ما فهمت شو صار. يمكن إنت ما تركتا عن قصد. يمكن إنت حطيتا عندي تا تلاقيني. بس إنت، عرفت تسكّت عضمتك المشقوفة. فلقيتني وما عرفت. أنا شقفتي انوجعت. لقتك.. وحكيت. بس ما فهمت. ما فهمت كيف عرفتك وضيّعتك ولقيتك وما عرفتك وما عرفتني. حآخد مسكّن ألم لبين ما تتذكر. حسكّت العضمة لبين ما تزورك الذاكرة. عجلي الزيارة.. النفس عم يختنق.. والوجع بيقتل.

غريب كل شيء في عيون الإحساس. تحب وتكره وتتألم ولا تفهم. يرحلون وأنت وحيد. تحلم بلقاء، بقبلة، بغمرة، بكلمة. تحلم وتتحدى الواقع. تتحدى الحياة بنفسها. كالطفل العنيد تصبح تريد ما تريد ولا تفهم قوانين اللعبة. هي اللعبة تنص على ألا تحصل على ما تريد. أتفهم؟ لا أن تتألم وتبكي الحزن. بل أن تلعب. وفي اللعبة ربح وخسارة. أتدري ما الخسارة؟ أن تفرح في الربح والخسارة هو الربح بعينه. الخسارة هي فشل التوقع. ومن أنت لتتوقع؟ إلعب. وستربح دائماً ﻷنك لا تنتظر الربح. ﻷنك فائز في عيونك فكيف تخسر؟ هنا يكمن اﻷلم. نظن أننا خاسرين في لعبة الحياة. خاسرين في الطموح. في الحلم. في الحب. في العائلة. مع الشريك. فنقع في دوامة الخسارة. أظن أنها رحلت عني. وأني وحيدة. محاطة بالحب، لكن وحيدة. رحل هو اﻵخر، في القلب والذهن. هو بقربي لكنه ليس هنا. رحل الثالث باحثاً عن نفسه. وكيف ألومه. رحلوا هم أيضاً مع لمساتهم. ثم رحلت هي وابتسامتها وعيونها الدافئة. قصص خرافية تنتهي. تكتب وتقفل صفحاتها الممتلئة. لا متسع لنهايات أخرى. فنخسر شخصياتنا ﻷخرى. ونخسر القصة في اﻷلم، بحثاً عن نهاية أفضل. ولا نهاية أفضل من نهايتنا. فمن نحن لنخط...

إلى كل الذين يعيشون على هامش الحياة. ولا أقصد برسالتي هؤﻻء التعساء الذين اعتكفوا الحياة وتصوفوا بأحزانهم وجالسوا ذكرياتهم واﻷلم. هذه رسالة إلى كل من أحب. إلى كل من عشق. إلى كل أم حملت طفلاً. إلى كل من زار معابد العالم. إلى كل من سافر. إلى كل من تعلم لغة بلد جديد. إلى كل من أدهشته شوارع الدنيا. ولم يجن.   يدهشني من يدور العالم ويزور مدن الدنيا، مدن الحب واﻷلم والجوع، ويعود متأثراً لكن ليس بمجنون. فتجارب الحياة تجبرها على التوقف. بعض التجارب تجبر الحياة على أن تستريح فنغرق في مكان واحد، في شخص واحد، في قصة واحدة.. والحياة واقفة. يصبح العمل والعلم والعائلة واﻷصدقاء تفاصيل . وقصة واحدة تصبح الحياة. أخاف اليوم أن أستمر فتموت الذكرى. أخاف أن أستمر بالحياة،  فتنتهي تجربة لا زلت واقفة عندها، لا زلت فيها وأحلم بشخصياتها. كيف يعودون وليسوا بمجانين. وحدهم المجانين يختبرون الحياة بعواصفها. وحدهم المجانين يعيشون.

28/03/2015 يوميات صمتي اليوم الرابع. ما بظن بعد في صمت. كل ما عوز إحكي عم بحكي. بحضرة أصدقاء مهتمين ومحبين بسكت، بيمنعوني. بس غير هيك، عم بحكي. بهاللعبة بين صمت وحكي، وبفشل الصمت أوقات، عم حس بقيمتو. حسيت قدي الكلمة سهلة. وقدي السكوت غالي. وكل ما إحكي حس إنو فشلت وعم بخسر. تاري الناس بتحب الصمت. بيتشوقو يعرفو قصتو أكتر من الحكي. بيسمعو وبيصغو لهمسات. وبتكبر مسؤولية المتكلم الصامت لأنو جمهورو مهتم. كل ما إحكي حس إنو عم بخسر جمهوري. ارجعت فكرت مسرح. كنت حس حالي شاطرة بالإح ساس والحكي والصوت. بس ما بعرف لغة الجسد وصمت الفاه. بلشت اربط إنو إذا الصمت اليومي أغلى وأمتع من الكلام فأكيد الصمت المسرحي أقوى وأجمل من الحكايا المحكية. مش يعني الكلام ما إلو قيمة، بالعكس. لأنو إلو قيمة لازم نعرف نختار أيمتا كلام وأيمتا صمت. أيمتا فضة وأيمتا دهب. عبرة اليوم: الصمت مسؤولية، بتلعب عالحبلين. مسؤولية كبيرة على الصامت لأنو في جمهور ناطر ومستمع متشوق. بس مسؤولية أكبر على المستمع لأنو بيفهم من الصمت لي بيشبهو وبيسمع صوت نفسه هو، المستمع.

27/03/2015 يوميات صمتي اليوم الثالث. حلو الصمت الخارجي إذا برافقو رواق داخلي. بس العجقة الداخلية مع الصمت الخارجي بتصير كتير متعبة. وهون منوصل لداخل وخارج متضاربين وبدن يلعبوا وما عارفين كيف. تالت يوم كان صعب ومتعب وما كان في كتير مودة بين فكري وصوتي. كان في حيصة وصيحة داخلية واقفة عحاجز الوتر. مش قادرة تضل جوا وممنوع تطلع لبرا. فرض الصمت تحول لخنقة وضجة فكرية عالية كتير. ضرب الوتر وقطع الحاجز. كسرت الصمت وحكيت.. شوي. اضطريت. كان صعب الصمت بحضرة المهرجان لي كان عم بدور براسي. بصخب الليل. بحلاوة الصدف واللقاءات. صرت بدي عبر وما بدي. ما بدي يربح صوتي عالوتر. وصار كأنو الوتر أب والصوت إبنو المتمرد. الوتر حساس ورقيق. هو أساس الصوت وخيفان عليه. والصمت دوا وحنية واحترام للوتر الحزين. بس الصوت ما عاد حملو راسو وطاش وصرخ. ما صرخت يعني بس إنو حكيت. وزعلت من حالي ليه حكيت. وارجعت اتحدى حالي. وهيك كانت لعبة اليوم التالت. عبرة اليوم: بقولو السعادة هي لما لي بتفكرو ولي بتقولو ولي بتعملو بكونوا بتناغم وانسجام مع بعض. أنا كنت عم فكر ضجة وما اقدر قول وما يكفي شو أعمل.

26/03/2015 يوميات صمتي اليوم الثاني. تاني يوم صمت كان ولا أحلى من هيك مغامرة. اسمعت صوت الدني. كل أصواتا. ولعبنا سوا. لطالما حسيت إنو الحياة صديقة بتمازحني كل الوقت. بتكب عليي ألعاب وفرقيع وشتي أوقات بس دايما منتفاهم ومنضحك سوا. وهيك كان تاني يوم صمت. كان غريب بس مليان أصوات وضحك. شفت صوتي بعيون محبيني. حكيوا عني وفهموني من ضحكتي. حسيت بالحب أكتر. كل قريب اتعاون تا يفهم صمتي. وأنا فهمت صوتي أكتر من ورا صمتي. مسرحيات وصور وخبار عم بتدور براسي وتطلع من وجي ضحكة. من أحلى ما  اختبرت، عرض رثاء عجبني كتير وحزني وأمتعني بنفس الوقت. أحلى شي كان بالعرض هو إيقاعه البطيء لي بيتضارب مع إيقاع صوتي وحياتي. فهمت إنو الصمت دني إيقاعا مختلف. محل، فيه الرواق و'بطء' الوقت مقدرين ومثيرين. حبيت الصمت لأول مرة لأنو حبيت فيه البطء. الحكي في عجقة وضجة فكر وكلام. أما الصمت فهو مش بس رواق الكلام، هو رواق الفكر كمان. ورواق الفكر أحلى لعبة فينا نلعبا. عبرة اليوم: الصمت إلو إيقاع غريب عن إيقاع الصوت والكلام. إيقاع جديد. أهدى وأطول وأبطء. حلو بطء الصمت. بطء الفكر. بطء الوقت. بيسمحلنا نلعب مع الحياة أكتر...

25/03/2015 يوميات صمتي اليوم الأول. من كم ساعة قلي الحكيم إنو واحد من أوتاري الصوتية مجروح وتعبان كتير ولازم التزم الصمت لمدة عشرة أيام تا يصح. أول شي خطر ببالي إنو كيف بكون موجودة بمكان وزمان ووسط ناس بلا صوت؟ كيف بثبت وجودي بلا صوتي؟ فكرت.. مسرح. هو مطرح بعلمني كون بجسدي مش بس بصوتي. وصاروا هال 10 أيام مغامرة ولعبة. بدي اتعلم فين كون، بطريقة جديدة. بلا ما عوز الكلمة.. كتير.  أصعب شي بأول يوم، إنو في 100 فكرة عم تلعب براسي و100 صورة وخبرية وما فيي قول منن شي. فعم بلش  اختصر أفكار. تجربة حلوة قطعت فيا اليوم، هي كزدورة مع صديق. هو يحكي وأنا اضحك. يحكي عني وعنو ويفهم مني وأنا اضحك منو. اكتشفت قدي حلو الواحد يضطر يسكت أوقات ليضطر التاني يحكي. عبرة اليوم: السكوت، مش يعني عم بتصير الإشيا من طرف واحد. هي دايما عم تصير من طرفين. بس واحد تغير شكلو والتاني تغير صوتو. الأول تعلم يحكي بشكلو والتاني تعلم يعلي صوتو. كل شي إلو صوت، حتى الصمت. صوت صمتي اليوم كان ورقة وقلم وصوت صديق.