يُقال بالحياة لِغزينْ:
الحُبْ
والموتْ.
أنا أصعبْ لغزْ عندي
هو الحزنْ.
من وين بيجي؟
ليه بيجي فجأة؟
شو بدّو؟
بتكون الدّني بخير
والإشيا حلوة
والناس طيبة ومحبّة...
بيجي الحزنْ زهقانْ يدقّ بواب
يوقف عشبّاك أسودْ
واقف عضوّ قمرْ.
شو بدّو؟
بِزور كتارْ
بيتنكّر بلْباس الحبّ أوقاتْ،
وأوقاتْ بينتِحِل شخص الموتْ.
بس هو الحزنْ
لابس غير ألوانْ
وجايي يزورْ.
الموتْ،
بتصرّخ عليه
بِتْخانْقُه
بِتْقلُّه يْفلّْ
وبْتِبْكيه.
الحُبْ،
بتعيِّطْلو،
بتِفْتَحْلو، بتأهِّل فيه
لبينْ ما تفهمْ...
وتِبْكيه.
بس الحزنْ،
شو بتعمل معو؟
غريب،
رايق،
هادي،
ما بِقولْ شي.
بيجي بيحتلّ خلايا ومساحاتْ
بيِقعُدْ فيك
كأنو مطرحو
ما فيك تحكيه
وقدْ ما هادي، ما فيك تصرّخ عليه.
شو بدّك يا حزنْ؟
بتدِّقْ وبتفوتْ
وبتِبْقى
لحدّ ما إِلْتِهي عنّك وإنساك
وتِرجعْ تدّقْ
وتفوتْ
وتبقى.
ذكي وناعمْ
محتالْ
مِحتلّْ
هيدا بحياتي اللّغزْ.
تعليقات
إرسال تعليق